Սենց ասեմ. եթե էս ֆիլմը չստացվի նենց, ոնց մենք ուզում ենք, ես դադարեցնում եմ երաժշտությամբ զբաղվելն ու գառի միս ուտելը:

Այս պրոյեկտը կարևոր է անձամբ ինձ համար ոչ միայն «Հայ Տղեք»-ի պատմությունը և առհասարակ հայկական ռեփ մշակույթի ստեղծումը վավերագրելու տեսանկյունից, այլ նաև որպես նոր շունչ հայկական կինոմատոգրաֆիայի մեջ, որի հիմքում ընկած են իրական դրաման և մարդկային փոխհարաբերությունները:

«Հայ Տղեք»-ը հերթական կենսագրական ֆիլմ չի լինելու․ Վերարտադրում ենք 2000-ականները, Հայաստանի անդերգրաունդ երաժշտական իրականության էներգիան, պատմում խմբի կազմավորման, վերելքի, սկանդալների, բաժանման մասին եւ ոչ միայն։ Մենք մի ամբողջ դարաշրջան ենք վերակենդանացնում էկրաններին:

Մարտահրավեր է. վերստեղծել մի ամբողջ ժամանակաշրջան, ճշգրիտ վերարտադրել աուդիո-վիզուալ բոլոր դետալները, նկարահանել ֆիլմ մարդկանց մասին, ովքեր եղել էին ու կան մեր կողքին, միավորել խաղարկային կինոն ու ռեփ երաժշտությունը եւ ստանալ գեղարվեստական աշխատանք, որը յուրահատուկ մեդիավկայություն կդառնա նաեւ ապագա սերունդների համար։ Ուժեղ թիմ է, վստահ եմ՝ կունենանք բացառիկ գեղարվեստական ֆիլմ։